തിരുവനന്തപുരം: സംസ്ഥാനത്തെ തിരുവനന്തപുരം  കൊച്ചി നഗരങ്ങളില്‍ മന്തുരോഗം പടരാനുള്ള സാധ്യത. ഇത്തരത്തിലുള്ള മുന്നറിയിപ്പ് ആരോഗ്യ വകുപ്പ് അധികൃതരുടെ ഭാഗത്തുനിന്നുമാണ് ഉണ്ടായിട്ടുള്ളത്. 

എന്നാല്‍ ഇത് നിയന്ത്രിക്കുന്നതിനുള്ള പ്രതിരോധ പ്രവര്‍ത്തനങ്ങള്‍ ആരോഗ്യ വകുപ്പ് അധികൃതരുടെ ഭാഗത്തുനിന്നും ഉണ്ടാകുന്നില്ലെന്ന ആക്ഷപവും ശക്തമാണ്. തിരുവനന്തപുരം കോര്‍പ്പറേഷനിലെ 12 വാര്‍ഡുകള്‍, കൊച്ചി  കോര്‍പറേഷന്റെ 74 വാര്‍ഡുകള്‍, തൃശൂര്‍ കോര്‍പ്പറേഷനിലെ ഒമ്പത് വാര്‍ഡുകള്‍ എന്നിവിടങ്ങളിലാണ് മന്ത് രോഗം പടരാനുള്ള സാധ്യത ഏറെയാണെന്ന് കണ്ടെത്തിയിട്ടുള്ളത്. ഈ പ്രദേശങ്ങളില്‍ ഇത് സംബന്ധിച്ച ജാഗ്രത നിര്‍ദേശം നല്‍കിയിട്ടുണ്ട്. ഈ മാസം 26 മുതല്‍ 28വരെ സമൂഹ മന്തുരോഗ നിവാരണയജ്ഞം സംഘടിപ്പിക്കാന്‍ തീരുമാനിച്ചെങ്കിലും ഈ പ്രേദേശങ്ങളില്‍ കാര്യക്ഷമമായ പ്രതിരോധ പ്രവര്‍ത്തനങ്ങള്‍ക്ക് നേതൃത്വം കൊടുക്കാന്‍ ആരോഗ്യ വകുപ്പിന് കഴിഞ്ഞിട്ടില്ല.  

മന്തുരോഗ നിവാരണത്തിന് കേന്ദ്രം നല്‍കിയ രണ്ടരക്കോടി രൂപ സംസ്ഥാന സര്‍ക്കാര്‍ പാഴാക്കുന്നുവെന്ന് നേരത്തേതന്നെ ആക്ഷേപം ഉയര്‍ന്നിരുന്നു.  ഈ തുക വേണ്ട വിധത്തില്‍ ഉപയോഗിച്ചുള്ള പ്രതിരോധ പ്രവര്‍ത്തനങ്ങള്‍ കാര്യക്ഷമമായി നടന്നിരുന്നെങ്കില്‍ ഇപ്പോഴുണ്ടായിട്ടുള്ള ഗുരുതരമായ സാഹചര്യം ഒഴിവാക്കാന്‍ കഴിയുമായിരുന്നതാ#യി ആരോഗ്യ പ്രവര്‍ത്തകര്‍ പറയുന്നു. 

കൊച്ചി നഗരപ്രദേശങ്ങളില്‍ മന്തുരോഗബാധിതരുടെ എണ്ണം കൂടുകയാണ്. ജില്ലയിലെ 1899 രോഗികളില്‍ 1300 പേരും നഗരസഭാ പ്രദേശത്തുള്ളവരാണ്. ഇതില്‍ 1800 പേര്‍ക്ക് കയ്യിലും കാലിലും രോഗബാധയുണ്ട്. കൊച്ചി കോര്‍പറേഷന്റെ 74 വാര്‍ഡുകളില്‍ മന്തുരോഗം പടരാനുള്ള സാധ്യത ഏറെയാണെന്നും ആരോഗ്യവകുപ്പിന്റെ മുന്നറിയിപ്പുണ്ട്. കൂടാതെ തൃശൂര്‍ കോര്‍പറേഷന്‍ പ്രദേശം, ചാവക്കാട്, ഗുരുവായൂര്‍, കാസര്‍കോഡ്, കണ്ണൂര്‍ ജില്ലകളുടെ ചില ഭാഗങ്ങള്‍ എന്നിവിടങ്ങളിലും രോഗികളുടെ എണ്ണം ക്രമാതീതമായി പെരുകി. അന്യസംസ്ഥാന തൊഴിലാളികളെത്തുന്ന മേഖലകളില്‍ രോഗം പടരുകയാണെന്നും ആരോഗ്യവകുപ്പ് മുന്നറിയിപ്പ് നല്‍കുന്നു. ഇതിന്റെ ഭാഗമായാണ് തലസ്ഥാന ജില്ലയുടെ വിവിധ ഭാഗങ്ങളില്‍ മന്ത് രോഗികളുടെ എണ്ണത്തിലുണ്ടായിട്ടുള്ള വര്‍ധന വ്യക്തമാക്കുന്നത്. 

കേന്ദ്ര സഹായമായ രണ്ടരക്കോടിയില്‍ ഒരു രൂപപോലും ചെലവഴിക്കാതെ ആരോഗ്യവകുപ്പ് മന്തുരോഗ നിര്‍മാര്‍ജന പദ്ധതിയെ തഴഞ്ഞു. ഇതുമൂലം ഇതുവരെ മന്തുരോഗം റിപ്പോര്‍ട്ട് ചെയ്യപ്പെടാത്ത ഇടുക്കി, പത്തനംതിട്ട, വയനാട് ജില്ലകളില്‍ രോഗ ബാധിതരുണ്ടായി. ഒപ്പം മറ്റു ജില്ലകളില്‍ രോഗബാധിതരുടെ എണ്ണം  ക്രമാതീതമായി വര്‍ധിച്ചു.