അന്തിക്കാട്: ജനങ്ങളുടെ സങ്കല്പ്പത്തിലുള്ള കമ്മ്യൂണിസ്റ്റ് പാര്ട്ടി സിപിഐ ആയതിനാലാണ് മറ്റ് സംഘടനകളില് നിന്ന് നിരവധി പേര് സിപിഐയിലേക്ക് വരുന്നതെന്നും അത് സ്വാഭാവികമാണെന്നും സിപിഐ സംസ്ഥാന സെക്രട്ടറി പന്ന്യന് രവീന്ദ്രന് പറഞ്ഞു. ഏതുപാര്ട്ടിയില് നിന്നാണെങ്കിലും കൊള്ളാവുന്നവരാണെങ്കില് സിപിഐ സ്വീകരിക്കുമെന്നും അദ്ദേഹം വ്യക്തമാക്കി.
സിപിഐ നേതാവും മുന്മന്ത്രിയുമായ കെ പി പ്രഭാകരന്റെ മൂന്നാം ചരമവാര്ഷിക ദിനാ ചരണം ഉദ്ഘാടനം ചെയ്തശേഷം വാര്ത്താലേഖകരോട് സംസാരിക്കുകയായിരുന്നു അദ്ദേഹം.
ലോകത്ത് ഏറ്റവുമധികം ചര്ച്ചചെയ്യപ്പെടുന്ന ഒന്നായി മാര്ക്സിസം മാറിക്കഴിഞ്ഞതായി സമ്മേളനം ഉദ്ഘാടനം ചെയ്തുകൊണ്ട് പന്ന്യന് പറഞ്ഞു. ഇപ്പോള് മന്മോഹന് സിംഗിന്റെ നേതൃത്വത്തില് മുതലാളിത്ത മൂല്യങ്ങളെ ഇന്ത്യന് ജനതയുടെ മേല് അടിച്ചേല്പ്പിക്കുകയാണ്. സിപിഐ നടത്തിയ ദേശവ്യാപകമായ പ്രക്ഷോഭങ്ങളുടെ ഭാഗമായിട്ടാണ് ഇന്ത്യയില് ബാങ്കുകള് ദേശസാത്കരിച്ചതെന്നും പന്ന്യന് പറഞ്ഞു.
നെയ്യാറ്റിന്കരയില് യുഡിഎഫ് നേടിയ വിജയം കൊലപാതകം വോട്ടാക്കിമാറ്റാന് ശ്രമിച്ചതിന്റെ ഫലമാണ്. ഇടതുപക്ഷത്തിന് ഇത്തരം കാര്യങ്ങളില് തെറ്റുപറ്റിയിട്ടുണ്ടോയെന്ന് സ്വയംവിമര്ശനം നടത്തണമെന്നും അദ്ദേഹം പറഞ്ഞു. രാഷ്ട്രീയ പ്രവര്ത്തനമെന്നാല് എതിരാളികളെ വകവരുത്തലല്ലെന്നും മറിച്ച് ആശയസമരമാണ് നടത്തേണ്ടതെന്നും പന്ന്യന് കൂട്ടിച്ചേര്ത്തു. സമ്മേളനത്തില് സിപിഐ ജില്ലാ സെക്രട്ടറി സി എന് ജയദേവന് അധ്യക്ഷത വഹിച്ചു. സിപിഐ സംസ്ഥാന സെക്രട്ടേറിയറ്റ് അംഗം കെ പി രാജേന്ദ്രന്, ദേശീയ കൗണ്സില് അംഗം വി എസ് സുനില്കുമാര് എംഎല്എ, എഐവൈഎഫ് സംസ്ഥാന സെക്രട്ടറി അഡ്വ. കെ രാജന്, പി കെ കൃഷ്ണന്, കെ വി വിനോദന്, ടി ആര് രമേഷ്കുമാര്, വി കെ മോഹനന്, പി ബാലചന്ദ്രന്, കെ എം ജയദേവന് എന്നിവര് പ്രസംഗിച്ചു. സിപിഐ നാട്ടിക മണ്ഡലം സെക്രട്ടറി സി ആര് മുരളീധരന് സ്വാഗതം പറഞ്ഞു.
|
കേരളം
Home
