തിരുവനന്തപുരം: സംസ്ഥാന ചലച്ചിത്ര അവാര്ഡുകള് വിതരണം ചെയ്തു. സെനറ്റ് ഹാളില് നടന്ന ചടങ്ങില് മുഖ്യമന്ത്രി വി എസ് അച്യുതാനന്ദനാണ് 2009 ലെ ചലച്ചിത്ര അവാര്ഡുകള് വിതരണം ചെയ്തത്. മലയാള സിനിമയിലെ സമഗ്ര സംഭാവനയ്ക്കുള്ള അവാര്ഡ് പ്രശസ്ത സംവിധായകന് കെ എസ് സേതുമാധവന് ഏറ്റുവാങ്ങി. മികച്ച നടനുള്ള അവാര്ഡ് മമ്മൂട്ടിയും മികച്ച നടിക്കുള്ള അവാര്ഡ് ശ്വേതാമേനോനും ഗായകനുള്ള പുരസ്കാരം കെ ജെ യേശുദാസും മുഖ്യമന്ത്രിയില് നിന്നും സ്വീകരിച്ചു.
കലാമൂല്യമുള്ള സിനിമകള്ക്ക് വിജയസാധ്യത എന്നുമുണ്ടെന്നും മലയാള സിനിമയില് ഇന്ന് വിവാദങ്ങള് വളരുകയാണെന്നും ഇത്തരം വിവാദങ്ങള് സിനിമയെ തകര്ച്ചയിലേയ്ക്ക് നയിക്കുമെന്നും ഉദ്ഘാടന പ്രസംഗത്തില് മുഖ്യമന്ത്രി പറഞ്ഞു. തൊഴില് നിഷേധമടക്കമുള്ള വിവാദങ്ങള്ക്കുപകരം കലാമൂല്യത്തെയും സര്ഗാത്മകതയെയും കുറിച്ചുള്ള ചര്ച്ചകളിലേയ്ക്കാണ് മലയാള സിനിമ ചിന്തിക്കേണ്ടതെന്നും മുഖ്യമന്ത്രി വ്യക്തമാക്കി.
താരശോഭയും വര്ണമേളങ്ങളും സമ്മേളിച്ച സദസ്സില് മലയാള സിനിമയിലെ പ്രതിഭകള് വിവിധരംഗങ്ങളിലുള്ള അവാര്ഡുകള് മുഖ്യമന്ത്രിയില് നിന്നും സ്വീകരിച്ചു. മികച്ച ഹാസ്യനടനുള്ള അവാര്ഡ് സുരാജ് വെഞ്ഞാറമൂടും ബാലനടി ബേബി നിവേദിതയും കഥാകൃത്തിനുള്ള പുരസ്ക്കാരം ശശി പരവൂരും ഗാനരചനയ്ക്കുള്ള പുരസ്കാരം റഫീക്ക് അഹമ്മദും സംഗീത സംവിധായകനുള്ള പുരസ്കാരം മോഹന് സിതാരയും മുഖ്യമന്ത്രിയില് നിന്നും ഏറ്റുവാങ്ങി. മികച്ച സിനിമാഗ്രന്ഥ രചനയ്ക്കുള്ള അവാര്ഡ് ജി പി രാമചന്ദ്രനും സിനിമാ ലേഖനത്തിനുള്ള അവാര്ഡ് വി എസ് രാധാകൃഷ്ണനും കെ പി ജയകുമാറും ഏറ്റുവാങ്ങി.
സാംസ്കാരിക മന്ത്രി എം എ ബേബി അധ്യക്ഷത വഹിച്ചു. ചലച്ചിത്ര അക്കാദമി ചെയര്മാന് കെ ആര് മോഹനന്, മേയര് സി ജയന്ബാബു, വി ശിവന്കുട്ടി എം എല് എ തുടങ്ങിയവര് സംസാരിച്ചു.
|
കേരളം
Home
